2 polis, pusher naangol sa raid

Ronda sa Criminal Investigation and Detection Group 7 misangpot sa pagkaangol sa duha ka polis ug pagkaangol usab sa suspetsadong pusher nga kalit namusil kanila diha sa Tayud, lungsod sa Liloan kagahapon sa kaadlawon.

Samdan nga midangat sa usa ka pribadong tambalanan sila si SPO3 Reynaldo Matillano ug PO2 David Enterena pulos mga sakop sa Criminal Intelligence and Detection Team (CIDT) sa CIDG.

Ang suspek giilang si Jayvee Miag-ao, hingkod ang panuigon ug kasamtangang nagpuyo sa Cansaga lungsod sa Consolacion. Sumala pa ni Chief Inspector Fermin Armendares III ang hepe sa CIDT nga level two si Miag-ao ug maoy supplier og shabu sa pipila ka mga dapit sa Talisay, Consolacion ug sa Villagonzalo ning dakbayan sa Sugbo.

Si Armendares sa pakighinabi sa Banat News mitug-an nga sila si Matillano ug Enterina maoy poseur buyer sa pagpalit og drogas nga lima ka gramo nga nagbalor og P45,000 diha sa usa ka drug runner nga si Dante Halang alyas Dansoy nga molupyo sa Simborio, Tayud lungsod sa Liloan.

Si Halang na maoy mitawag kang Miag-ao ug miorder og shabu, tuod man miabot ang suspek uban sa iyang drayber nga naila lang sa ngalan nga "Chikong" nga taga Villagonzalo ning dakbayan sa Sugbo.

Wala makabantay ang duha ka polis nga ang giputos sa malong nga gikuptan ni Miag-ao kalibre 45 pistola diay, diha nalang sila nakalitan pagduol nila kalit silang gidul-itan og pusil sa suspek.

Si Matillano naigo diha sa tiyan diin miungot ang bala samtang si Enterina naigo usab sa walang bahin sa hawak nga milapos ang bala, apan bisan samdan mibawos ang duha ug gituohang naigo ang suspek gumikan sa mga lama sa dugo diha sa giagian sa mga suspek.

Gumikan sa kangitngit ug kadaghan sa mga kahoy sa lugar nakaikyas ang mga suspek maong giuna og dala nila ni Armendares sa tambalanan ang duha ka kauban.

Gidakop usab nila pagkabuntag si Halang diha sa balay niini ug nakuhaan og mga gamit pagsuyop, mga basiyo sa paketeng may lama sa gidudahang shabu, usa ka kalibre 38 snubnose nga rebolber nga may upat ka buhing bala ug mga tooter.

Si Miag-ao dunay warrant of arrest sa kasong murder gikan sa sala ni RTC Judge Silvia Aguirre-Paderanga.

Padayon pa ang hot pursuit operations sa kapolisan batok sa mga suspek.