2 level-2 drug pushers nasikop sa Duljo

Duha ka mga gidudahang level two drug pusher sa Duljo-Fatima ning dakbayan sa Sugbo ang nangadakpan sa kapolisan kagahapon sa kaadlawo

Usa kanila inahan sa usa usab ka drug suspect nga mieskapo sa iyang gwardiya sa milabay'ng tuig.

Natanggong karon sa karsel sa kapolisan mao sila si Valeriano Macol Jr. hingkod ang panuigon ug Betty Abellana, hingkod na ang panuigon ug parehong residente sa Plastikan sa samang barangay.

Sumala pang Supt. Pablo Labra sa Criminal Investigation and Intelligence Branch sa Cebu City Police Office ang duha dugay nang gipanid-an sa ilang iligal nga negosyo sa drogas.

Armado sa search warrant nga gipagawas ni RTC branch Meinrado Paredes gironda sa CIIB uban sa usa ka platoon nga sakop sa Regional Mobile Group, Special Weapons And Tactics ug Mobile Patrol Group ang maong lugar sa pagtuong matimpuhan nila ang mieskapong si Arnold Abellana kinsa mieskapo sa jailguard niini niadtong milabay'ng tuig human sa hearing niini sa korte. Si Arnold Abellana gikatahong kanunay'ng armado.

Nakuha sa kapolisan gikan kang Macol ang lima ka medium size nga paketeng may sulod nga gidudahang shabu samtang kang Abellana mao ang tulo ka dakong plastik ug unom ka paketeng medium size nga pulos may sulod nga gidudahang shabu uban sa mga drug paraphernalia ug duha ka buhing bala sa kalibre .357.