1st Ready Reserve Battalion bag-o na'g commanding officer

Pormal nang gipasa kagahapon ni Lieutenant Colonel Crescencio Rocamora sa Philippine Army Reserve ang iyang pwesto isip battalion commander sa 1st Cebu Ready Reserve Battalion ngadto kang Major Richard Sison.

Ang seremonyas gihimo diha sa Philippine Army Reservist Center sa Camp Lapu-Lapu diin si Colonel Guillermo Luyao Jr., ang group commander sa 7th Reserve Community Defense Group maoy pinasidunggang dinapit.

Ang bag-ong battalion commander sa 1st Cebu Ready Reserve Battalion nga si Sison sa iyang pamahayag mitug-an nga palambuon pa ang organisasyon sa maong grupo atol unya sa iyang termino.

Usa sa iyang giplano mao ang pagpahigayon og reorientation sa tanang mga opisyal sa maong batalyon aron mas mahimo silang epektibo sa ilang trabaho sa tanang higayon.

Matud pa niya nga kinahanglang mapakita sa reservist sa Philippine Army ngadto sa publiko nga gawas sa aktibong mga sakop sa Philippine Army duna pay epektibo ug kasaligang reserve battalion ang Army dili lang panahon sa gubat kundili panahon sa kalinaw ilabi na kun dunay mga kalamidad.

Sagad sa mga kalihukan sa maong grupo mao ang pagpahigayon og mga civic action, pagtabang pagbantay atol nga dunay mga dagkong kasaulogan dinhi sa rehiyon ug labaw sa tanan kun dunay mga kalamidad.

Ang mga sakop sa reserve battalion gilangkuban sa mga kanhi tinun-an sa kolehiyo nga mitapos og Reserve Officers Training Course, diin ang mga opisyal duna nay mga trabahong propesyunal apan gipili ang pagserbisyo sa militar matag dunay bakanteng panahon.