Dangoy nangunay kampanya vs drugs

Gipangunayan sa mayor ug hepe sa kapolisan sa lungsod sa Compostela ang kampanya sa ilegal nga drugas pinaagi sa ilang personal nga pagduaw sa mga kabalayan sa Poblacion,Cogon ug uban pang barangay sa Compostela.

Matud pa ni Compostela Mayor Antonio Dangoy kini ilang gihimo alang sa paghatag og giya sa mga ginikanan nga dili mahitumpawak ang ilang kabataan sa ilegal nga drugas hinungdan nga ang Citizens Anti Crime Organization (CACO) pinaagi sa ilang presidente nga si Mario del Mar mihimo sa maong kampanya sa mga kabalayan inubanan sa mga sakop sa kapolisan.

Atol sa maong kampanya gibutangan sa mga opisyal sa maong lungsod ang mga kabalayan og stickers nga naglatid sa "Pamilya ko Ayaw sa Drugas" diin gihangop usab sa mga ginikanan ang maong programa.

Matud pa ni del Mar nga dunay mga livelihood program sa kagamhanang lokal nga ihatag sa mga residente sa maong dapit inabagan sa CACO.

Gipanghimakak usab ni Insp. Ramon Lacno, hepe sa kapolisan sa Compostela nga naghitak ang ilegal nga drugas sa maong lungsod.

Matud pa ni Lacno nga dunay mga impormasyon nga diha moagi sa ilang lungsod ang shipment sa ginadiling drugas ug dad-on sa bukirang bahin sa Compostela apan sa ilang gihimong pagpaniid negatibo ang maong inpormasyon.