Gwen 'utok pulbura'

Grupo sa mga walhong militanteng pundok misaway sa plano ni Gobernador Gwendolyn Garcia pagtukod og duha ka grupo sa Citizens Armed Forces Geographical Unit (CAFGU) nga motabang sa operasyon sa militar batok sa insurhensiya sa lalawigan. Si Arman Perez, Central Visayas Secretary General sa Bayan Muna mitawag ni Garcia og "utok pulbura" tungod kay para nila dili kasulbaran sa insurhensiya ang pagtukod og insurgency task force.

Kini maoy pagsaway human si Garcia mipahibalong motukod siya og task force nga mogukod sa mga rebelde ug mosuporta sa pag-organisa og mga kalihukang kontra-rebelde.

Sa maong plano gimandoan ang militar ug kapolisan sa lalawigan sa pagpasiugda sa maong operasyon ug mipadayag nga siya mismo maoy moduol sa National Defense aron magpatabang sa pagtukod og duha ka kumpanyang CAFGU nga ibutang sa norte ug sa amihanan isip kaabag sa militar ug kapolisan.

Ang kapitolyo na maoy mohatag sa mga allowances sa maong mga CAFGU subay usab sa balaod kung asa kutob ang mahimong ihatag sa lokal nga kagamhanan.

Matud ni Perez nga nagpasamot sa gihambin nga kasuko sa katawhan ang plano ni Garcia ug ang pagka-utok pulbura sa gobernador walay maayong padulngan.

Gitataw ni Perez nga ang tumong sa ilang pagpahigayon og rali diha sa atubangan sa kapitolyo mao ang pagkondenar sa "all out war" ni Garcia.

Ang grupo sa Bayan Muna, Gabriela ug Karapatan nabalaka nga sila maoy prinsipal nga target sa all out war ni Garcia.

Gitataw ni Perez nga ang national government wala mopili sa ilang target ug gilakip niini ang grupo nga mga gidudahang misuporta sa armadong pakigbisog.