'Adik' nagpusil sa dughan

Tungod sa pagkagumon sa ginadiling drugas ug nalisoan sa maayong panghunahuna, usa ka lalaki naghikog pinaagi sa pagpusil sa iyang kaugalingon sa miaging adlaw alas 11:30 sa buntag sa East Poblacion, Tuburan.

Matud pa sa taho nga midangat sa Cebu Provincial Police Office nga sa wala pa mahitabo ang paghikog nag-inom og duha ka botelyang beer diha sa luyo sa ilang panimalay si Rey Lendon Gallardo Toralba, 21, ulitawo, nagpuyo sa maong lugar.

Matud sa kapolisan sa Tuburan nga si Toralba human niya mahurot og inom ang duha ka botelya sa beer, mikuha kini og armas nga 38 paltik, dayong pusil sa iyang kaugalingon tumong sa walang dughan.

Human namatikdan sa mga ginikanan si Toralba nga nahagba na gisuwayan unta pagdala sa Tuburan District Hospital, apan patay na kining nahidangat sa maong tambalanan.

Base sa pamahayag sa ginikanan ni Toralba nga tiggamitan ang ilang anak og ginadiling drugas sulod sa dugay nang panahon, gani matud pa nga nalisoan na sa maayong panghunahuna.

Ang kapolisan nakakuha og duha ka buhing mga bala ug duha usab ka kabhang nga diha nagtangag sa 38 paltik nga maoy iyang gigamit pagpusil sa iyang kaugalingon.