Castro mi-deny P75-P200 'bayad'

Ang kontrobersiyal nga kanhi piskal nga si Mary Ann Castro mihimakak nga iyang gisugo ang iyang sekretarya sa pagpangolekta og bayad sa mga kliyente sa Bureau of Immigration balor P75 ngadto sa P200 pesos matag transaksiyon.

Kini ang giluwatang pamahayag ni Castro agi'g reaksiyon sa migawas nga balita nga kini nangolekta og notarial services sa transaksyon sa imigrasyon sulod sa buhatan sa BID-7.

Matud pa ni Castro nga walay kamatuoran ang maong impormasyon gumikan kay wala siya mohatag og pagtugot ni Normi Mante, ang iyang sekretarya nga mangolekta sa maong kantidad bisan anaa pa siya ug wala gyud mahitabo ang maong alegasyon.

Samtang si Mante mihimakak usab nga siya nahinabi sa reporter sa pamantalaan nga nagsuwat sa balita.

Gumikan niini mibahad si Castro nga iyang pasakaan og kaso ang pamantalaan kun dili mohimo og public apology.

Ang maong isyu nagsugod sa dihang si Mante mitug-an nga siya gisugo ni Castro nga mokolekta og P75 ngadto sa P200 alang sa pirma gamit ang rubber stamp ni Castro bisan pa kun wala kini sa iyang buhatan ilabi na sa mga notarial services.

Si Castro nagpabiling usa sa mga legal officer sa BID-7 human nga si Justice Secretary Raul Gonzales miluwat og mando niadtong Pebrero 15 ning tuiga nga si Castro usa ka 4th assistant city prosecutor sa dakbayan sa Sugbo ug temporaryong i-detail sa BID-7 alang sa pag-asister sa maong buhatan.