Labakara hinungdan sa hikog

Gumikan lang sa labakara nga bulingon usa ka tawo gituhoang naghikog pinaagi sa paghigot og pisi sa liog ug namatay sa miaging gabii luyo sa iyang panimalay sa sityo Tube Ice, Banilad, Mandaue.

Ang biktima mao si Jeffrey Clava, 25, minyo, trabahante sa usa ka furniture firm ug nagpuyo sa maong dapit.

Si PO3 June Mondejar sa Casuntingan Police Station miingon labakara nga bulingon maoy hinungdan sa paghikog sa biktima.

Subay sa asoy ni Maylyn Clava, 23, asawa sa biktima nangayo og labakara ang biktima.

Daw nasuko kini nga gihatagan og bulingong labakara ug nagbagulbol ug nanugon nga ikaw maoy buhi sa ilang duha ka mga anak ug milakaw.

Dugang pa ni Mondejar nga gipahimangnoan pa sa asawa ang biktima nga last warning na kini sa tagdumala sa buhatan tungod kay kanunay kining nagpalta.

Milakaw ang biktima sa ilang panimalay ug ang igsuon na niining babaye maoy nakakaplag didto sa luyo nga nagbitay ug patay na.