Laputan bros. di pa makagawas

Wala pa mahingpit ang kagawasan sa magsuong Laputan nga nahukman nga walay sala sa kasong pagpanglugos.

Ang kasong pagpanglugos nga giatubang nila ni Concordio ug Maximo Laputan gi-dismiss ni Jugde Rafael Yrastorza tungod sa kakuwang og ebidensya sa prosekusyon pagtumbok silay naglugos ni Mylene, 13, didto sa Ocaña, Carcar.

Sila si Concordio ug Maximo Laputan wala pa makagawas sa Cebu Provincial Detention and Rehabilitation Center (CPDRC) tungod kay aduna pay laing giatubang nga kasong gipasaka ang kapolisan sa Carcar nga direct assault.

Ang kapolisan sa Carcar maoy mipasaka og kasong direct assault batok sa magsuon tungod kay misuway kini pagsukol sa kapplisan sa Carcar pinaagi sa pagtion og guna atol niadtong giimbitar sila aron moadto sa police station ug ma-imbestigar.

Kagahapong adlawa mao ang hearing sa kasong direct assault sa magsuong Laputan sa Carcar Municipal Trial Court.

Ang officer in charge sa CPDRC records section nga si Clarito Ignora miingon nga pabilin nga natanggong sa CPDRC ang magsuong Laputan bisan pa sa pag-dismiss sa korte sa kasong pagpanglugos niini.

Si Police Chief Inspector Teofilo Siclot sa Carcar atol sa interbiyu kaniya sa usa sa mga sibyaanan sa radyo dinhi sa Sugbo miingon nga wala pa siya makadawat og kopya sa desisyon sa korte sa pag-dismiss sa kaso sa magsuong Laputan.

Matud pa ni Siclot nga kun aduna siyay makuha nga dugang ebidensya batok sa magsuomg Laputan iya kining iduso ngadto sa korte aron mabuksan og balik ang kaso nga gidesisyonan na sa korte.