Ex-NPA gipatay

Gidudahang kanhi sakop sa rebeldeng New Peoples Army (NPA) ug karon maoy tigbantay sa luna sa mga Lhuillier ang gipusil patay sa wala mailhing tawo niadtong Lunes sa gabii sa Santikan gibana-banang 20 ka kilometros ang gilay-on gikan sa dakbayan sa Danao.

Samad pinusilan sa walang bukton ug walang bahin sa iyang lawas ang biktimang giila nga si Valeriano Matos, 56, minyo nga nagpuyo sa susamang lugar.

Base sa pamahayag sa asawa sa biktima sumala pa ni SPO4 Jose Salingua ang biktima uban sa iyang asawa nga si Concordia gikan nitambong og katapusang pangadye sa silingan niini.

Apan giingong giatngan sila sa wala mailhing mga lalaki ug kalit lang kini gidul-itan og pusil gamit ang wala matinong kalibre sa armas ang biktima, ang tanod nga si Justino Gomez maoy nitaho sa kapulisan.

Si SPO4 Jose Salingua sa Danao Police Station nga nahinabi sa Banat News mitug-an nga niadtong Marso 30, 2000 nadakpan ang biktima sa mga sakop sa militar tungod kay aduna kini giatubang nga kasong frustrated murder ug gi turn-over ngadto sa Danao Police Station.

Matud ni SPO4 Salingua nga nalutsan og warrant ang maong biktima, apan nakagawas pagka July 3 sa susamang tuig tungod kay naka piyansa kini alang sa temporaryong kagawasan.

Wala isalikway ni SPO4 Salingua nga nakadungog sila kaniadto nga kining biktima aktibo kini sa kalihokan sa mga walhon. - ban sa taho ni Bong Soriano