P2.8M giapod ni Gwen sa Asturias

Mikabat sa P2.8 milyones ang nadawat nga financial assistance kagahapon sa 14 ka barangay kapitan sa lungsod sa Asturias.

Ang kagamhanan sa probinsiya sa Sugbo mipahigayon og dental and medical mission diha sa covered court sa maong lugar.

Atol sa maong kalihokan gitunol usab ang tseke ngadto sa mga barangay kapitan nga nagkantidad og P200 mil matag usa.

Ang Asturias adunay 27 ka barangay apan 14 lang ka kapitan ang mitungha kagahapon para modawat sa maong hinabang.

Kahinumduman nga ang ubang opisyal sa lungsod dili pabor sa administrasyon ni Garcia ug wala tugoti nga mopahigayon sa unang medical mission diha sa covered court sa barangay Poblacion sayo niining tuiga.

Lima lang ka konsehal sa Asturias ang mitambong kagahapon sa maong kalihokan wala motungha si Mayor Letecia Orosco ug si Bise-mayor Alexander Agravante.

Si Gobernador Gwendolyn Garcia miawhag sa mga opisyal sa lungsod sa paghikling sa politika ug makig-ayuda sa kagamhanan sa probinsiya para mahatagan og kaayohan ang tanang taga Asturias.

Si Garcia mibahad nga kung dili magpakabana ang mga opisyal sa lungsod para makabenepesyo ang mga residente sa lugar sa tanang gihatag nga tabang sa probinsiya mismo ang kagamhanan sa probinsiya maoy motunol na niini sa katawhan.

Si Bise-gobernador Gregorio Sanchez kinsa usa usab ka oposisyon miawhag usab sa pakighiusa ug dili ipatigbabaw ang politika para mahatagan og kaayohan ang katawhan.