Polis sa Lapu kasuha'g pagpangilad

Usa ka polis sa dakbayan sa Lapu-Lapu posibleng pasakaan og kasong pagpangilad o pagpangilkil sa magtiayon nga iyang gikuhaan og kwarta bugti sa paltos nga titulo sa yuta nga iyang gibaligya.

Personal nga miduol sa Banat News si Ofelia Manching ug ang bana niini aron ireklamo ang usa ka polis sa Lapu-Lapu nga si SPO4 Edgar Sagarino nga nadestino sa presinto 2 sa Barangay Mactan.

Matud pa ni Manching nga niadtong bulan sa Pebrero ning tuiga si SPO4 Sagarino miduol kaniya ug nangayo og balor P35 mil alang sa paglihok sa iyang papeles ngadto sa City Assessor's Office alang sa titulo niini nga mabalhin sa ngalan ni Manching.

Sumala pa ni Manching dili unta siya mohatag sa maong kantidad ngadto kang Sagarino apan gigamit niini ang ngalan ni Sonia Espinosa, city accessor sa dakbayan sa Lapu-Lapu nga maoy nagsugo kaniya sa maong kantidad aron malihok ang mga papeles niini, hinungdan nga iya kining gihatagan sa maong kantidad.

Atol sa pagbisita ni Manching sa assessor's office, si Espinosa mihimakak nga iyang gisugo si SPO4 Sagarino pagkuha sa P35 mil ug wala siya makahibalo sa maong transaksiyon sa yuta nga gibaligya sa polis.

Nagpakahilom lamang si Manching sa maong impormasyon hangtod nga mibalik si SPO4 Sagarino kay mokuha na usab unta kini og laing P10 mil kay kulang sumala pa niini ang kantidad sa pagproseso sa papeles sa yuta.

Gumikan niini, gisudyaan ni Manching si SPO4 Sagarino sa maong transaksiyon ug gihatagan og tagal nga duha ka bulan sa pagpabalik sa kantidad nga nahatag na niini. Apan sukad niadtong bulan sa Marso hangtod kagahapon sa pagpa-blotter niini sa kapolisan sa dakbayan sa Lapu-Lapu, nagtagotago na si SPO4 Sagarino ug wala na igkita ug dili na matawgan sa iyang telepono hinungdan nga iya kining gireklamo ngadto sa hepe sa kapolisan sa dakbayan sa Lapu-Lapu.

Si Lapu-Lapu City Police Chief, Supt. Louie Oppus nga nahinabi sa Banat News mingon nga dili siya modupa sa gihimo sa iyang tawo gumikan kay usa kini ka pribadong transaksiyon tali ni SPO4 Sagarino ug Manching ug wala kini naglambigit sa iyang trabaho isip polis.

Matud ni Oppus nga aron dili ma-bias ang resulta sa himuong imbestigasyon mas maayo nga didto sa Provincial Internal Affairs Service, Regional Internal Affairs Service o sa Ombudsman-Visayas ipasaka ang maong reklamo ni Manching gumikan kay sa iyang level ang labing taas nga ikahatag nga silot sa usa ka hepe sa kapolisan 15 ka adlaw lang nga suspension ug pag-forfeit sa iyang suhulan.

Gumikan niini, ang magtiayong Manching naglaraw sa pagpasaka og kasong pagpangilad o pagpangilkil batok ni SPO4 Sagarino ngadto sa kadagkuan sa PNP o sa Ombudsman Visayas.

Ang Banat News naninguha nga makontak si SPO4 Sagarino sukad pa sa miaging adlaw apan wala kini pirme sa iyang buhatan hinungdan nga wala pa kini kakuhai sa iyang habig.