P148 mil nakuha's tulisan

Secretary sa usa ka department store uban sa bagger gitulis sa duha ka tawo nga nagtaptap sa nawong samtang nagsakay og traysikad sa Beatriz Village Road, Poblacion, Danao sa milabay'ng hapon ug nakuhaan kini og P148 mil.

Sila si Mary Jane Lagoros, 21, dalaga lumad nga taga Katigbian, Bohol ug secretary sa Novo Department Store sa Danao City ug Senedios dela Cerna, 22, ulitawo nga nagpuyo sa Labangon, dakbayan sa Sugbo ug bagger sa maong department store maoy nakuhaan sa maong salapi.

Matud pa ni Lagoros atol sa imbestigasyon ni PO3 Glen Manulat sa Danao Police Station nga samtang luwan sila sa usa ka traysikad padulong sa bangko alang sa pagdeposito sa ilang kinitaan sa adlaw'ng Sabado, Domingo ug Lunes mga 1:30 sa milabay'ng hapon pag-abot sa Beatriz Village Road duha ka tawo nga luwan og motorsiklo nga nagtaptap sa ilang dagway mibabag kanila.

Usa sa tulisan mikuha sa bag nga ilang gisudlan sa salapi samtang nagtion og armas ngadto kanila hinungdan nga wala silay nahimo gawas sa paghatag niini.

Human sa maong insidente dali nga misibat ang duha ka tulisan padulong sa dakbayan sa Sugbo, samtang si Lagoros ug dela Cerna mitaho kini sa kapolisan sa dakbayan sa Danao.

Pakyas ang kapolisan sa Danao pag-ila sa mga tulisan, bisan sa gihimo niining hot pursuit operation.

Matud pa ni PO3 Manulat daghang anggulo nga angayang sutaon sa ilang padayong imbestigasyon ug usa na niini ang posibilidad nga "inside job" sa pagtuo nga may empleyado nga nakahatag og tip ngadto sa mga tulisan sa oras ug kantidad nga dad-on sa mga biktima ngadto sa bangko.

Kagahapon pipila ka mga empleyado sa Novo Department Store gipatawag ug giimbestigar sa kapolisan sa Danao alang sa kasulbaran sa maong kaso.