Koreana giilogan og kotse sa karnaper sa Mabolo

Usa ka Koreana nabiktima sa nag-inusarang karnaper kinsa nagpakaaron-ingnong naaberyahan sa iyang sakyanan apan mangilog diay og sakyanan diha sa dalan Tres Borces Padres sa Mabolo ning dakbayan kagahapon sa buntag.

Ang biktima nga midangop sa Mabolo Police Station giilang si Devorah Lee, 45, minyo ug kasamtangang nagpuyo sa dalan Timog, Gentle Breeze dakbayan sa Mandaue.

Sumala pa sa imbestigasyon sa Mabolo police ang biktima padulong na og hatud sa iyang anak sa tunghaan niini dihang sa pag-abot sa nahisgutang lugar gipara kini sa suspek.

Dihang gihunungan kalit nga misulod ang suspek ug milingkod tupad sa biktima, sa kahadlok sa naulahi dali silang nanganaog sa sakyanan.

Apan diha-diha misutoy og padagan ang suspek dala ang kolor pula nga Kia Avella nga nakarehistro sa pangalan ni Kim Sanhei, wala hinuon matino sa biktima ang plate number sa iyang awto.

Samtang sa laing bahin usa ka Indian national nga tigpautang ang gitulis sa duha ka armadong lalaki diha duol sa usa ka gasolinahan sa Bulacao ning dakbayan.

Si Hamdeep Singh,23, walay nahimo dihang gitiunan og wala matinong kalibre sa armas de fuego sa mga suspek nga kalit nga mibabag sa iyang agianan.

Gikuha sa duha ang iyang cellphone ug nakolektang P5,000 ug daling miikyas sakay sa usa ka Honda TMX nga kolor itom palayo sa maong dapit.