Muslims paapilon ni Tomas sa Sinulog fest

Dako ang kahigayonan nga moapil ang kahugpungan sa mga Muslim dinhi sa Sugbo sa Sinulog mardi gras karung sunod tuig.

Kini human gitanyagan ni Mayor Tomas Osmeña ang mga Muslim nga mosalmot sa Sinulog sunod tuig ug gipasaligan pa niya kini nga siya maoy mo-sponsor sa ilang mga gastuhan.

Nahitabo kini atol sa panagtagbo sa mayor tali sa dul-an sa napulo ka mga Muslim leader kagahapong adlawa nga gipangulohan ni Ustadz Haron Magadapa, ang regional chairman sa Halal Fatua Council ug sa Cebu Green Mosque.

Gitug-an sa mayor nga wala pa hinuon mohatag og positibong tubag ang mga Muslim ug wala usab kini mobalibad.

Gipasabot sa mayor nga seryoso siya sa mao niyang gitanyag nga pagpa-apil sa mga Muslim sa Sinulog sunod tuig gumikan kay ang maong kalihukan na-impluwensiya man kini sa maong relihiyon.

Si Osmeña nga maoy honorary sultan sa Sugbo mipadayag nga ang suliran sa terorista masulbad kini pinaagi sa pagpalig-on sa relasyon tali sa mga Sugboanon ug sa Muslim community.

Kini tungod kay nagpasabot kini nga gidawat sa mga Sugboanon ang mga Muslim dinhi sukwahi sa ubang mga lugar sama didto sa Manila nga wala hatagi og importansya.