Gihimo ang operasyon sa kapolisan pagka-Domingo sa hapon dayon nang kilomkilom sa Pasol, Alcoy nga miresulta sa pagkasikop ni Eutiquio Camelo Belandres, 36, minyo kauban nga tanod ug silingan sa biktimang si Teresito Arriesgado Bralao sa Sitio Cangcabalong, Obo, Dalaguete.
Si Belandres nasikop didto sa balay sa iyang igsuon sa Pasol, Alcoy human kini milayas sa ilang panimalay sa Obo human sa hitabo.
Si PO3 Christopher Requina sa Dalaguete Police mitug-an nga si Belandres positibong giila sa duha ka mga saki nga maoy gitumbok nga mipusil ug midunggab sa biktima sa makadaghang higayon.
Hinuon si PO3 Requina nagdumili sa pagtug-an sa mga ngalan sa saksi kay matud pa nga ila karon gitinguha nga makuhaan og affidavit ang mga saksi.
Matud ni PO3 Requina nga adunay karaan nga panagbangi ang suspetsado ug ang biktiam nga posibleng maoy hinungdan nga gipatay ang biktima sa naulahi.
Ang suspek ug ang biktima parehong aktibo sa pagkatanod sa ilang barnagay gani pulos kini sakop sa Bantay Lasang nga gimugna sa lungsod sa Dalaguete, Municipal Acquatic and Natural Resources Office (MANRO) nga maoy magbantay o tigpanalipod sa mga lasang sa mga nahisakop sa ilang hurisdiksyon.
Si PO3 Requina miingon nga dili mominos 18 ka samad dinunggaban ug usa ka samad pinusilan ang naangkon sa biktima.
Kagahapon sa buntag gidala si Belandres sa Sugbo aron ipaubos sa paraffin test sa pagtino nga nakapabuto og armas ug laing giandam sa kapolisan mao ang kasong murder ngadto kaniya.