Nanulong gi-'samurai' patay

Patay ang usa ka lalaking armado og sundang nga misulong sa panimalay sa iyang kaaway ug nanghagit og tinigbasay dihang gisuklian sa iyang gisulong kinsa armado usab og espada sa samurai diha sa dalan F. Llamas Punta Prinsesa ning dakbayan.

Nagbuy-od nga wala nay kinabuhi diha sa kusina sa balay sa suspek ug nakaangkon og daghang samad tinigbasan ug dinunggaban si Vicente Labajo Labrador Jr. alyas Dondon, 48, minyo ug molupyo sa Guadalupe Village sa nahisgutang barangay.

Samtang ang gikaharong niini og tinigbasay kinsa nalandig usab sa tambalanan giilang si Pableo Ubanan alyas Leo, residente sa maong dapit, gumikan sa dakong samad nga naangkon diha sa iyang tuong kamot.

Sumala pa sa imbestigasyon ni SPO3 Zenaido Pastorfide sa Homicide Section, misulong si Dondon diha sa balay ni Ubanan aron tapuson na ang dugay na nilang panagbangi duha na ka tuig ang nakalabay.

Matud pa sa mga kabanay sa duha nga nagkabangi ang duha sukad nga si Labrador na maoy gipabantay sa usa ka Emmanuel Ponce kinsa maoy nanag-iya og usa ka building. Wala matino kun nganong nasuko si Ubanan kang Labrador.

Giingong hubog nga misulong si Labrador sa balay ni Ubanan nga nagdala og bolo, nianang tungora si Ubanan pagkakitang dunay bolo si Labrador mikuha usab sa iyang "samurai" (espada sa mga Hapon nga samurai) nga may gitas-ong duha ka tiil ug siyam ka pulgadas.

Diha-diha nahitabo ang panagsangka sa duha diha mismo sulod sa balay nga misangpot sa kamatayon ni Labrador ug diha na kini mabugtoi sa kinabuhi sa kusina sa balay ni Ubanan.

Si Ubanan dali usab nga gidala sa Cebu City Medical Center. Giimbestigahan na karon sa kapolisan ang maong kaso.