Tanod gikiha'g murder

Gipasakaan og kasong murder ang usa ka 74-anyos nga barangay tanod sa Tejero ug ang anak niini sa milabay'ng adlaw sa Regional Trial Court Criminal Division.

Si Carmelino Vargas ug ang anak niining si Lemuel Bargamento maoy gipasanginlang mipusil ni Danilo Casinillo Jr. hingkod ang panugion ug residente usab sa Tejero.

Si Danilo Casinillo Sr. amahan sa biktima mibutyag nga gibaharan ni Bargamento nga patyon ang iyang anak kung padayonon ang relasyon niini ni Elsa igsoon sa suspetsado.

Ang insidente sa pagpamusil nahitabo niadtong Mayo 31 niining tuiga diha sa dalan Aviola sa maong barangay.

Si Casinillo Jr. nakaangkon og duha ka samad pinusilan sa walang dughan, usa sa tuong dughan ug usa sa tuong bukton ug maoy hinungdan sa iyang kamatayon.

Si Vargas ug Bargamento mihimakak sa mga pasangil batok kanila apan sila maoy gitudlo sa mga saksi nga mibuhat sa maong krimen.

Ang duha gisikop sa mga tanod sa barangay ug sa mga polis ug gidala sa Mobile Patrol Group (MPG).

Usa sa eye-witness mitumbok ni Vargas nga mao gyuy mipusil ni Casinillo Jr. hinungdan nga gikuhaan kini og paraffin test sa mga polis apan negatibo ang resulta sa maong paraffin test.