Lapis gidonar sa Lions sa Kapitolyo

Gitunol kagahapon sa buntag sa grupo sa Lions Club ni Gobernador Gwendolyn Garcia ang 40 mil ka lapis para ipang-apod-apod sa mga tinun-an sa 953 ka tunghaang elementarya sa probinsiya sa Sugbo.

Si Manolo Lao Council Chairman sa Cebu Lions Club, Jun Tiu presidente sa Lions Host Club sa Mandaue ug ubang mga miyembro maoy mitunol sa nahisgutang mga lapis.

Si Garcia mibutyag kagahapon nga aduna nay natagana nga mga notebook nga ipanghatag sa mga tinun-an sa grade I, II ug III.

Ang maong mga lapis ipuno sa paghatag sa 40 mil ka tinun-an sa grade two.

Ang tinun-an sa grade III makadawat og tulo ka notebook ug duha ka lapis.

Ang grade III makadawat og tulo ka notebook ug usa ka lapis matag tinun-an.

Ang mga tinun-an sa grade I hatagan og school bag, tulo ka notebook usa ka balon nga papel, ruler ug usa ka jumbo nga lapis.

Si Provincial School Superintendent Recaredo Borgonia mibutyag nga adunay 60 mil ka tinun-an sa grade I ug 50 mil sa grade III.

Matud ni Borgornia nga unang higayon pa kini karon nga ang mga tinun-an sa mga tunghaan sa probinsiya makadawat og mga gamit para sa iskwela.

Karong petsa 29 niining buwana atol sa inugurasyon sa mga karsada sa Bantayan ipang-apod-apod ang mga school supplies.

Ang kagamhanan sa probinsiya makig-ayuda sa mga Provincial Board, Bise-gobernador, mga mayor sa kalungsuran, mga Barangay Kapitan, mga presidente sa Parents Teachers Community Association (PTCA), District Supervisor ug mga magtutudlo para mahan-ay ang pag-apod-apod sa mga school supplies.

Sa maong adlaw ilusad usab ang programa sa tree planting sa mga tunghaan ug ang pag-apod-apod sa mga computer unit ug ang opening salvo sa kalihokan ipahigayon sa Bantayan.