Two-year high school gisugdan

Daghang mga tinun-an ang mipa-enroll sa bag-o lang gitanyag sa Department of Education nga two-year high school sa mga tinun-an sa publikong tunghaan dinhi sa siyudad sa Sugbo.

Gipahibalo sa consultant on education sa Cebu City Hall Augustus "Joy" Young nga dunay pito ka mga publikong tunghaan ang nagtanyag karon niining maong duha lang ka tuig sa high school.

Kini mao ang Talamban National High School, Pardo National High School, Gothong National high School, Florencio Urot, Don Sergio Osmeña ug Camp Lapu-Lapu National High School sa Apas.

Hinuon matud ni Young nga wala makaabot sa ilang gibanabana nga tag 35 ngadto sa 40 ka tinun-an ang matag section gumikan kay dunay ubang mga tunghaan nga wala kaabot og 20 ka tinun-an ang mipa-enroll.

Gitumbok ni Young ang Florencio Urot National high School nga maoy adunay labing taas nga enrolment nga moabot og 150 ka mga tinun-an ug ang Talamban National High School ug Don Sergio National High School sa Labangon maoy pinakagamay nga enrolment nga miabot lang og 15 ka tinun-an.

Hinuon matud ni Young gihatagan nila og higayon ang mga tinun-an nga mipa-enroll sa first year alang sa upat ka tuig nga high school nga maka-shift ngadto sa two-year high pagkahuman karong semester.

Kining maong programa gilusad sa siyudad alang niadtong mga tinun-an nga gikan sa kabus nga pamilya nga maglisud pagtiwas sa upat ka tuig nga high school nga moresulta lang hinuon sa pag-undang.

Ang maka-gradwar sa maong duha ka tuig nga high school ma-isyohan na kini og certification nga magpamatuod nga nakatapos kini sa duha ka tuig nga high school.

Sa higayon nga ganahan kini nga mopadayon sa pagtungha sa kolihiyo dunay ihatag niini nga qualifying exam ug kun makapasar una pa mahatagan og kahigayonan nga makapa-enroll sa college.