Miitsa sa sapa sa bata mitahan sa kapitan

Mitahan sa barangay kapitan ang minor de edad nga mikulata, mipakuryente, misulod sa sako ug mitambog sa 11-anyos nga bata ngadto sa sapa sa Ginabasan River sa New Bago, Asturias.

Kini ang nasayran sa Banat News sa follow up nga gihimo kagahapon kang PO2 Philip Acaso sa kapolisan sa nahisgotang lungsod.

Ang mitahan ngadto kang Kapitan Alison Bustillo sa Barangay Agbanga, Asturias mao si Joselito (apelyido gipugngan), 17 anyos nga nagpuyo usab sa maong dapit.

Si Joselito maoy gitumbok sa tulo ka mga bata nga nakasaksi sa maong hitabo nga pagkulata, pagkuryente, pagsulod sa sako ug hangtod na sa paglabay ngadto sa sapa ni Al Quirante Miano, 11-anyos kinsa wala pa gyud makit-i hangtod karon.

Si Kapitan Bustillo maoy mitugyan sa suspetsado ngadto sa kapolisan sayo sa buntag kagahapon.

Dugang pa ni PO2 Acaso nga sa imbestigasyon nga ilang gihimo migawas nga kuwarta nga nahanaw sa suspetsado maoy hinungdan sa kasuko sa biktima.

Matud pa ni PO2 Acaso nga gikatahapan sa suspetsado nga ang biktima maoy nagkawat sa iyang kuwarta.

Si PO2 Acaso miingon nga ang mga barangay opisyal ug lumolupyo sa New Bago ug Santa Lucia nga nagtadlas ang Ginabasan River maoy nagtinabangay karon sa pagpangita sa bata.