Sparrow unit molikidar sa mga kurakot nga opisyal

Mga sparrow unit sa New People's Army (NPA) nga bag-o pa nakahuman sa ilang mga pagbansaybansay anaa na karon sa ilang test mission paglikidar na sa mga opisyal sa gobyerno ug kapolisan.

Kini ang nasayran sa Banat News gikan sa usa ka sakop sa kapolisan nga dili lang magpaila sa pagpakighinabi kaniya niadtong miaging adlaw.

Ang gitumong nga likidahon sa test mission sa bag-ong graduate nga sparrow unit sa NPA naglakip sa mga supporter ni Pangulong Gloria Macapagal Arroyo, mga kurakot nga opisyal sa gobyerno ug kapolisan.

Si Mandaue City Police Director Eduardo Catabas nga gikahinabi sa Banat News miingon nga higpit na nilang gi-build up ang ilang intelligence network sa kabarangayan.

Nunot usab sa gibutyag ni Mayor Thadeo Ouano nga pagsulod sa 80 ka sakop sa mga terorista sa Sugbo alang sa paglikidar sa mga supporter ni Presidente Arroyo nga naglakip na kaniya.

Si Catabas miingon nga matinuod man o dili ang maong mga taho sa gihapon ilang kaakuhan ang pagbantay aron sa pagmintinar sa kahapsay ug kalinaw.

Naglakip na niini mao ang pagpalig-on pa sa ilang mga pagbantay ug ang pagpanalipod sa mga vital installation sa kagamhanan.

Dugang pa niya nagpadayon ang pagpatrolya sa kapolisan sa adlaw ug gabii ug ang pagpakighiusa usab sa katawhan sa kabarangayan maoy labing gikinahanglan aron usab sila labing epektibo sa pagtuman sa ilang trabaho.