Leyson sa LTO ipatangtang ni Tom

Nanganti si Mayor Tomas Osmeña nga iyang irekomendar ngadto kang Presidente Gloria Arroyo ang pagparelibo kang Director Alex Leyson sa Land Transportation Office (LTO) kon magdumili kini pagkooperar sa mga programang ipatuman sa mga kadalanan dinhi sa dakbayan sa Sugbo.

Wala malipay si Osmeña dihang nahibaw-an niini ang gipasar nga resolusyon sa Citom Board nga mipadayag og kasagmuyo sa gihimong pag-interbinir sa LTO may labot sa gihimong pagpanakop sa Citom sa mga multicab nga pasaheroan gikan sa mga kalungsoran sa habagatang bahin sa Sugbo nga padayong namasahero lahos sa F. Llamas ngadto na sa Punta Princesa.

Nasayran nga ang Traffic Management Group ug Citom pormal nga mipatuman sa rerouting sa mga multicab nga pasaheroan gikan sa mga kalungsoran sa habagatang Sugbo sugod niadtong unang adlaw sa pagbukas og balik sa klase.

Ang gireklamohan sa mga opisyal sa Citom Board nga samtang nagpadayon ang dakop sa mga drayber nga padayong mosupak sa rerouting pinaagi sa pag-isyu og mga TOP apan ang LTO gipasanginlang mi-"adjudicate" niini nga nahulog lang hinoon nga walay kapuslanan ang maong dakop sa mga drayber.

Segun sa report, ang operations division sa LTO-Manila pinaagi ni Analy Lontoc mipadayag kini nga mahimong maka-isyu og adjudication ang LTO ngadto sa mga drayber og multicab kun walay igong basehanan ang pagdakop kanila.

Hinuon lahi kining maong panghitabo kun itandi sa mga PUJ drayber sa Mandaue Jones nga rota gumikan kay mga citation tickets lang ang gipang-isyu niini.