BATA GIKULATA, GISUD SAKO, GILABAY SA SAPA

Usa ka 11-anyos nga batang lalaki gikulata, gipakuryintihan ug wala pa gayod matagbaw, gigapos ug gisulod sa sako hangtod gilabay ngadto sa sapa.

Kini nahitabo sa New Bago, Asturias alas 12 pasado ang takna sa udto niadtong miaging Martes.

Ang biktima mao si Al Quirante Miano, 11, ug nagpuyo usab sa maong dapit ug ang suspetsado mao si Jolito Maambong, hingkod ang panuigon ug nagpuyo sa Agbangan sa nahisgotang lungsod.

Si PO2 Jose Claro Hoyohoy nga gikahinabi sa Banat News miingon nga alas 4 na pasado ang takna sa hapon nilang nadawat ang maong taho.

Human usab si Almido Quirante Miano, 28 anyos, ulitawo ug igsoon sa biktima midangop sa pagpangayog panabang kang Inspector Noli Atencio Cerenio, hepe sa kapolisan sa maong lungsod.

Si PO2 Hoyohoy miingon nga ang biktima nga nakabaton og grabeng bun-og sa kalawasan gikan sa pagkulata niini nasaksihan sa tulo ka tawo ang dautan nga gibuhat sa maong suspetsado ngadto sa biktima.

Naglakip sa mga nakasaksi mao sila si Jomar Maniago, 13, Aina Maniago, 11 ug Gerald Inoy, 12 nga taga Agbangan sa mao gihapong lungsod.

Dugang ni PO2 Hoyohoy nga ang tulo ka bata mao usab ang nakakita sa paglabay sa bata ngadto sa Ginabasan River sa maong dapit.

Si PO2 Hoyohoy miingon nga sa ilang pakisusi sa Ginabasan River maoy ilang nasuta nga kusog kaayo ang bul-og sa tubig sa ilang pag-adto sa maong dapit ug ilang gituohan nga kini naanod na ngadto sa kadagatan nga maoy hinungdan nga wala na kini igkita. Hangtod karon pabiling wala makit-i ang bata.

Sa imbestigasyon nga ilang gihimo maoy nasayran nga duha na ka higayon nga nawad-an og kuwarta ang suspetsado ug maoy gipasanginlan ang biktima maoy nagkuha.