Way dautan sa pamahayag ni Ted

Dili dautan ang tan-aw sa Department of Tourism sa Central Visayas sa gibutyag ni Mandaue City Mayor Thadeo Ouano labot sa giingong 80 ka terorista nga nakasulod sa Sugbo.

Kini ang gipahayag ni DOT-7 Director Dawnie Roa atol sa press conference sa paglusad sa Tourism Congress kagahapon sa Marco Polo Plaza Hotel.

Matud pa ni Roa nga gibutyag ni Ouano ang maong intelligence report aron kini mahisgutan ug mapangandaman ilabi na nga anaa na sa tunga-tungang bahin sa tuig sa pagpahigayun sa Asean Summit sa Sugbo.

Apan iyang giklaro nga ang susamang intelligence report, angayan unang susihon una pa ibutyag ngadto sa publiko.

Mapasalamaton si Roa nga dili mobasa ang mga Hapon ug mga Koreyano sa mga pamantalaan sa Sugbo sanglit dili kini makasabot sa sinuwat nga English.

Gitugyan ni Mayor Thadeo Ouano ngadto sa consultant on police matter ang pagpakiglambigit sa Regional Intelligence and Investigation Division sa Police Regional Office-7 ang pagsusi sa gikatahong pagsulod sa Sugbo sa 80 ka mga terorista.

Si Ouano nagkanayon nga gitugyan niya kang Nixon Jojo Dizon, bana sa iyang anak, ang pagpakigkita sa hepe sa RIID nga si Supt. Agusto Marquez tungod sa kamanduan sa hepe sa PRO-7 Chief Supt. Silverio Alarcio. -