Mga militante gihangyo sa DOT

Dakong opisyal sa Department of Tourism miawhag sa mga militant groups nga dili mohimo og mga protest rally atol sa ASEAN summit nga ipahigayon sa Sugbo unya sa Disyembre.

Ang maong awhag giluwatan ni Tourism Undersecretary for Visayas and Mindanao Phineas Alburo atol sa launching sa Tourism Congress diha sa Marco Polo Hotel kagahapon.

Gitataw hinuon ni Alburo nga igo ra siya sa paghangyo sa mga militant groups kinsa misaad nga molusad og mga lihok protesta ngadto sa mga venues sa ASEAN summit aron sa pagpakauwaw kang Presidente Gloria Arroyo atubangan sa ubang mga pamuno nasud.

Samtang girespetahan ni Alburo ang kagawasan sa mga militant groups, mas gihatagan niya og gibug-aton ang negatibong epekto sa mga rallies.

Sa pangutana sa kahadlok nga si Mandaue City Mayor Thadeo Ouano nga usa siya sa target sa mga terorista apil sa ubang mga delegado sa ASEAN summit, si Alburo mipakagamay niini ug mipasalig nga kontrolado sa kagamhanan ang posibling kaguliyang.

Alang niya nga angayan suportahan ang umaabot nga ASEAN summit tungod kay usa kini sa paagi nga makaagni og dugang investors dinhi sa Sugbo.

Ang sunod nga tuig kanus-a mo-host og balik ang Pilipinas sa ASEAN summit unya pa sa tuig 2016.