3 nag-shabu, pusher sikop

Usa ka gidudahang pusher sa ilegal nga drugas ug tulo ka tawo nga nag-pot session nasikop atol sa gipahigayong saturation drive nga gisundan sa pagpangronda sa kapolisan sa Poblacion, Danao sa milabay'ng gabii.

Ang nasikop mao si Jeffrey Mapula, 23, nga nagpuyo sa Poblacion, Danao.

Matud pa ni Supt. Larson de Chino, hepe sa kapolisan sa Danao nga human nila madawat ang usa ka tawag sa usa ka concerned citizen mga alas 9:35 sa gabii nga nagpahibalo kanila nga dunay drug pusher nga namaligya og shabu sa dalan Olivar sa Poblacion, ila kining girespondehan.

Atol sa saturation drive, ilang nasigpatan si Mapula nga kadudahan ang lihok hinungdan nga ila kining gisita ug nakuha ang duha ka gagmay'ng pakete sa gituohang shabu ug gidala sa Danao Police Station.

Samtang mga alas 10 sa kagabhion sa susamang adlaw sa dalan Rizal sa Poblacion, Danao nasikop usab sa kapolisan sila si Teofilo Bravo Lipitin Jr., 27, taga Sabang, Danao ug Florencio Seco Cane Jr., 20, taga Masaba, Danao ug usa ka tinun-an sa high school.

Laing concerned citizen ang mitawag sa kapolisan sa Danao ug nagpahibalo nga dunay nagpadayong pot session sa dalan Rizal sa Poblacion hinungdan nga si SPO3 Edgar Awe ug mga kaubanan niini mihimo og pangronda.

Nakuhaan og mga ebidensiya nga kagamitan sa pagsuyop og shabu ang tulo. Ang kapolisan nag-andam na og kasong ipasaka batok sa upat.