Internet café sa Lapu gitinguhang i-regulate

Konseho sa dakbayan sa Lapu-Lapu mipasar og ordinansahon nga mag-regulate sa operasyon internet café ug ubang negosyo nga dunay kalambigitan sa internet sa dakbayan sa Lapu-Lapu.

Ang maong ordinansahon gipangamahanan ni Konsehal Eugene Espedido diin iya kining giduso atol sa gipahigayong regular session sa konseho sa dakbayan sa Lapu-Lapu sa milabay'ng adlaw.

Matud pa ni Espedido gumikan sa sunodsunod nga pagpangronda sa kapolisan diin nasuta nga gihimong usa sa mga materyales ug ekipo ang internet webcam sa cyber-pornography ug dili kini angayan nga pasagdan lang sa mga tag-iya og internet café, giduso niya ang ordinansahon.

Base sa maong ordinansahon kinahanglan nga ang matag establisamento nga nagnegosyo og internet mohatag kini og kopya sa ilang mga desinyo, lay-out ug konstruksyon ngadto sa Office of the Building Officials (OBO) o sa City Engineer's Office (CEO) sa dili pa tukoron ug pag-aprobar sa ilang business permit.

Matud pa ni Espedido nga kun sa sayo pa niini gihimo na kini sa mga opisyales sa OBO ug sa CEO malikayan unta ang mga panghitabo nga dunay mga tawo ug kabataan nga maaghat sa pagpangita sa website sa mga law-ay nga pornograpiya sulod sa internet café.

Kun mahimong ordinansa, kinahanglan nga kun duna man ugaling mga private rooms o mga cubicles kini himuon nga makita sa ubang kliyente sama sa pagbutang og pultahan nga makita ang tawo nga anaa sa sulod niini ug dili sarado.

Subay niini, ang CEO mohimo og desinyo nga mamahimong modelo sa mga himuong internet café ug kini mahimong sundon sa mga negosyante aron hapsay ang pagkuha sa ilang business permit sa maong negosyo.

Dili lamang ang mga tag-iya sa internet café ang mapasakaan og kaso o masilotan niini kun dili lakip usab ang mga kustomer nga masakpan sa mga otoridad nga mohimo og inspeksiyon sa mga internet café.

Ang makalapas niini base sa maong ordinansahon silotan og pagkabilanggo nga dili mo-ubos sa unom ka bulan ug dili molabaw sa 12 ka bulan depende sa ihatag nga silot sa korte ug multa nga P5 mil.

Matud pa ni Espedido nga ang mga sakop sa City Mayors Office, CEO, kapolisan, kapitan sa barangay, Business Inspection Board ug ang Anti-Indecency Board ang gitahasan sa pagpatuman sa maong ordinasa.