13-anyos mi-molestiya sa 6-anyos

Usa ka 13-anyos nga batang lalaki kinsa nakasinati na nga gi-molestiya sa usa ka bakla, mi-molestiya sa iyang kaduwa nga 6-anyos nga usa usab ka batang lalaki ug ang biktima buot usab untang buhaton ang gibuhat sa suspetsado nga pagmolestiya kaniya sa lain niyang higala.

Si PO1 Annalie Rufo, Women's Desk Officer sa Ginatilan, mibutyag kagahapon sa Banat News nga ang maong insidente nahitabo niadtong Disyembre sa milabay'ng tuig diha sa balay sa iyaan sa suspetsado sa lungsod sa Ginatilan.

Apan ang kaso napasaka batok sa suspetsado niadtong Pebrero niining tuiga diha sa sala ni Judge Jesus dela Peña sa Oslob Regional Trial Court (RTC) Branch 62.

Ang warrant of arrest sa suspetsado milusot niining buwan sa Hunyo.

Matud ni Rufo nga ang suspetsadong si Jerome (ngalan gipugngan) nakasinati na og molestiya sa usa ka bayot.

Si Jerome mihagad sa iyang kaduwa nga si Dan (ngalan gipugngan usab) nga iyang lubton tungod kay nakuryoso kini sa gibuhat sa bakla kaniya maong gibuhat usab kini niya sa lain.

Si Dan mihagad usab ngadto sa iyang laing kaduwa nga pahuboon kay iya usab kining lubton.

Apan ang kaduwa ni Dan misumbong sa iyang inahan hinungdan nga gisukitsukit si Dan sa iyang inahan ug mitug-an kini nga gilubot siya ni Jerome.

Ang mga ginikanan ni Dan miduso dayon og reklamo batok ni Jerome sa gibuhat niini ngadto sa ilang anak.

Si Jerome temporaryo karong gidetiner sa Ginatilan Police Station ug gikatakdang ibalhin karong hapon sa Regional Rehabilitation Center for Youth sa Argao.