P2.3M ipalit og computer para sa blotter system

Kapin sa duha ka milyon ka pesos ang gipagawas nga gahin sa kagamhanan sa siyudad sa Sugbo alang sa computerization sa blotter system sa Cebu City Police Office (CCPO) nga gitinguhang mapatuman sa dili pa ang Asean Summit karong Disyembre.

Gibutyag ni Loida Antonio, supervisor sa Management Information System (MICS) mokabat sa P2.3 milyones ang kinatibuk-ang kantidad sa 18 ka mga computer units nga ilang gipalit nga ibutang sa onse ka mga presinto sa kapolisan dinhi sa dakbayan apil na ang mga special units nga buhatan sa CCPO.

Si Konsehal Augustus "Jun" Pe, tsirman sa committee on dangerous drugs maoy mirekomendar ngadto kang Mayor Tomas Osmeña pagpatuman sa computerize blotter system sa kapolisan aron mas mamahimong epektibo ang maong buhatan sa ilang adlaw adlaw nga gimbuhaton.

Ang hepe sa CCPO, Supt. Melvin Gayotin maoy misuwat sa konsehal aron sagopon ang maong sistema human kanunay nga nakasinati og kalangay ang lainlaing mga presinto sa kapolisan pagduso sa ilang report.

Gawas sa onse ka mga presinto apil unya sa maong computerization program mao ang Homicide, CIIB, Theft and Robbery and Operations Section, Traffic Patrol Group, Mobile Patrol Group nga konektado sa buhatan ni Konsehal Procopio Fernandez, tsirman sa committee on police fire and penology.

Tumong niini aron dunay access ang Cebu City Hall sa mga natala sa blotter sa nagkalainlaing presinto sa kapolisan ug sa mga special unit niini.