3 gipatay atol sa Independence day

Tulo ka tawo ang gipamatay nga natala sa kapolisan sa lalawigan sa Sugbo samtang gisaulog ang Independence Day sa niaging adlaw.

Patay ang usa ka mag-uuma nga nailhan nga si Agapito Diama, 62 anyos, minyo nga taga barangay Santikon, lungsod sa Badian human dunggaba sa wala pa mailhing tawo samtang padulong mamista sa barangay Maloray lungsod sa Dalaguete niadtong Lunes sa hapon.

Ang biktima kauban sa iyang mga silingan nga sila si Sonny Villaroya, Polin Amar ug Deloy Endricoso ug sa dihang nahiabot sila sa may utlanan sa barangay Maloray ug Malapay, lungsod sa Dalaguete, kalit lang nipatim-aw ang suspek ug dayun dunggab sa biktima ug nakaangkon og lima ka samad hinungdan sa iyang hinanaling kamatayun.

Samtang usa ka mamuhatay og sapatos sa lungsod sa Carcar ang gipusil patay sa sityo Mahayahay, barangay Liboron, sa maong lungsod.

Alas 9 pasado sa gabii samtang sulod sa ilang balay ang biktima ang kalit lang gipusil patay sa duha ka tawo nga nailhan lang sa pangalan nga Romel ug Nelson.

Human sa pipila ka gutlo, usa ka Ronel Pantonial, ulitawo, ang gipusil patay usab sa barangay Poog, dakbayan sa Toledo.

Sakay ang biktima sa motorsiklo nga gimaneho sa usa ka Gil Lituania sa maong lugar aron pagpangita sa iyang igsoong babaye.

Paghiabot sa Joy Variety Store sa maong lugar, usa ka wala mailhing grupo ang nipusil lima ka higayun sa biktima dayun sibat palayo sa lugar.

Ang biktima gidala sa mga istambay sa Toledo City District Hospital apan patay na kining nadangat sa tambalanan.