Vigilante nakit-ang dunay posas

Ika-165 nga biktima sa gidudahang vigilante gitumba kagahapon sa buntag samtang naghimo og lapida daplin sa dalan sa sam-ang sa Carreta ning dakbayan, ang mipusil sumala pa sa mga saksi nakit-ang dunay posas ug holster ang suspek.

Wala na makaabot nga buhi sa tambalanan ang biktimang si Benjamin Raganas, 42, molupyo sa samang dapit gumikan sa upat ka igo sa bala diha sa iyang ulo ug lawas agi sa gituuhang kalibre nga pistola.

Sumala pa ni PO2 Buenaventura Ursaiz sa Homicide Section duha ka mga lalaking sakay sa usa ka crypton nga motorsiklo nga kolor blue ug pula ang mihunong duol sa gikahimutangan sa biktima.

Ang sakay niini maoy mikanaog ug mipusil sa biktima ug dihang nahagba giusban pa kini una pa miikyas, nianang tungura usa ka testigo ang nakakitang dunay posas ug holster ang gunman dihang giibot sa suspek ang armas ug ingon man dihang gibalik ang pusil human pagpusil kang Raganas.

"Pag-ibot nakit-an lagi kuno sa usa sa mga testigo ang posas ug pagbalik na sa pusil," sumala pang Ursaiz.

Upat ka mga basiyo sa kalibre 45 nga bala ang napalgan sa Scene of the Crime Operation nga sagad maoy gamiton sa mga gidudahang vigilante sukad nga nagsugod ang pagpamatay sa mga gidudahang mga badlungon ug dunay mga criminal records.

Si Police Regional Office 7 director Chief Supt. Silverio Alarcio sa pakighinabi sa Banat News kagahapon sa buntag nagkanayon nga iyang gimandoan si Cebu City Police Director Melvin Gayotin sa pag-imbestigar sa maong kaso lakip na ang bahin sa nakit-ang holster ug posas.

Apan giklaro ni Alarcio nga wala magpasabot nga dunay holster ug posas mga polis na gyud ang mga killer ni Raganas sanglit mapalit ra bisan asa ang maong mga butang.

"Very speculative pa iyan (polis ang hitman) dahil ang posas is highly accessible," asoy pang Alarcio kinsa una nang namahayag nga bisan polis pa ang mga sakop sa vigilante kun dunay makatudlo ug mobarog nga testigo ilang taralon sa hukmanan.

Samtang si Gayotin sa pakighinabi kagahapon miawhag sa nakakita sa pag-adto sa ilang buhatan o sa bisan asang law enforcement agency aron mohatag og pamahayag kabahin sa ilang nakit-an aron matabangan ang kapolisan sa pagsulbad sa maong kaso.

Sukad niadtong Disyembre 22, 2004 miabot na og 165 ka tawong dunay mga criminal records ang gitumba apan bisan usa wala pay nasulbad ang Homicide Section gumikan usab sa kawalay kooperasyon sa mga kabanay sa biktima ug mga testigos gumikan sa kahadlok.

Apan si JO1 Catherine Cintos sa Bagong Buhay Rehabilitation Center mibutyag nga walay rekord diha sa BBRC ang biktima, sagad sa gipamatay sa mga vigilante kadtong dunay mga rekord sa maong bilanggoan.

Si SPO1 Jay Yballe sa pakighinabi mibutyag posibleng naalaan ra ang biktima apan midugang nga dunay mga nakaestorya nilang mga taga diha nga mitug-ang tigamitan og drogas si Raganas.