80 ka terorista ipasusi ni Alarcio

Gipasusi na karon ni Police Regional Office 7 ang migawas nga taho nga dunay 80 ka teroristang nakasulod na sa dakbayan sa Mandaue aron paghimo og kasamok base usab sa pamahayag ni Mayor Thadeo Ouano niadtong milabay'ng adlaw.

Matud pang Alarcio sa pakighinabi kagahapon nga walay nadawat nga susamang impormasyon ang intelligence community kabahin sa presensya sa maong mga tawo.

Apan bisan paman iyang gimandoan si Sr. Supt. Agustu Marquez ang hepe sa Regional Intelligence and Investigation Division aron mokuha og mga detalye diha sa buhatan ni Ouano.

Giangkon ni Alarcio nga niadtong gipahigayon ang South East Asian Games dinhi sa Pilipinas dunay napulo ka mga teroristang nakasulod dinhi sa Sugbu aron mamomba apan wala kini mahinayon gumikan sa kahigpit sa seguridad.

Kahinumduman niadtong SEA Games dunay kapin 5,000 ka mga polis ug sundalong gipabantay sa Metro Cebu aron masigurong luwas ang tanang duwa nga anhi gipahigayon.

Wala hinuon isalikway ni Alarcio ang posibilidad nga dunay himuong pagpangatake ang mga terorista dinhi. Karong Disyembre ipahigayon dinhi sa Sugbu ang 12th Association of South East Asian Summit nga tambungan sa libuan ka mga delegado gikan sa nagkadaiyang miyembrong nasud.

"We could assume that they wanted to disrupt the conduct of ASEAN summit here," sumala pang Alarcio.

Samtang gipadayag ni Alarcio nga andam siyang padugangan ang gwardiya ni Ouano ug ubang mga opisyal sa gobiyerno kun ugaling tinuod ang maong impormasyon nga naglakip sa giingong dautang plano sa maong grupo nga tumbahon ang mga lokal nga mga lider dinhi.

Si Alarcio maoy gibutang dinhi sa mga kadagkuan sa kapolisan gumikan sa kasinati niini sa pagpalig-on sa seguridad kontra mga terorista ug planong pagpatay sa mga prominenteng tawo,siya maoy miandam sa seguridad ni anhing Santo Papa Juan Pablo II niadtong mibisita kini. — Uban sa taho ni Greg Rubio