80 ka terorista, sparrow dia na

Gimando ni Mayor Thadeo Ouano ngadto sa kapolisan nga labi pa gayod nga lig-onon ang pagbantay sa Marcelo Fernan Bridge, Mactan Mandaue Bridge, oil depot ug uban pang vital installation sa kagamhanan.

Kini gihimo ni Ouano human usab niya madawat ang taho nga 80 ka terorista ug mga Sparrow Unit sa New Peoples Army (NPA) ania na dinhi sa Sugbo.

Matud pa ni Ouano, sa 80 ka gidaghanong terorista nga ania karon sa Sugbo wala pay usa nga nasikop sa kapolisan ug 72 niini kanila padayon pa nga gisusi ang ilang mga gitagoan.

Matud pa niya nga maoy tuyo sa maong mga terorista ang pagpamomba sa mga vital installation sa kagamhanan ug ang paglikidar sa pipila ka mga opisyal nga naglakip na kaniya.

Hinuon kuwang sa pagtuo si Ouano sanglit wala man gayod kini ikakompirmar sa kapolisan dinhi sa Sugbo.

Dugang pa niya nga maoy iyang pagtuo nga ang pagpalakaw sa pagsulod sa mga terorista ug Sparrow Unit sa mga NPA aron lamang sa paghatag og kakuyaw sa katawhan aron sa paghulga sa Asean Summit karong Disyembre.

Si Mandaue City Police Office (MCPO) Sr. Supt. Eduardo Catabas nga gikahinabi sa Banat News mikompirmar usab sa maong taho nga ilang nadawat.

Matud pa niya dili pa gyod angay nga tuhoan sa katawhan ang taho nga pagsulod sa maong gidaghanon sa mga terorista sanglit nagkinahanglan pa gyod og tukmang pakisusi.

Si Catabas miingon nga mitumaw man o wala ang maong mga hulga apan ang kapolisan padayon sa ilang higpit nga pagbantay sa dautang pundok sa katawhan.