Police trainee 'naunay' sa armas

Usa ka field trainee sa kapolisan gidudahang naunay sa iyang service firearm sa tuong bitiis human miresponde sa usa ka alarma nga gikalambigitan sa mga nagrambol nga mga batan-on diha sa usa ka imnanan sa dalan Mango Avenue, Camputhaw ning dakbayan sa milabayng gabii.

Samdan nga nadangat sa Cebu City Medical Center si PO1 Alex Buanhog, residente sa dalan Martires ning dakbayan ug kasamtangang nagpailawom sa field training program sa PNP ug gidestino diha sa Fuente Police Station.

Sumala pa sa imbestigasyon sa Homicide Section nga padulong na uli si Buanhog ug kaubang trainee nga si PO1 Rene Bentulan gikan sa police station 2 dihang naagian ang kagubot diha sa Autoshop Restobar sa Mango Square sa nahisgutang dapit.

Si PO1 Rene Bentulan sa pakighinabi sa Banat News nagkanayon nga si Buanhog miuna og kanaog sa multicab samtang giparking pa ni Bentulan ang sakyanan.

Apan giingong dihang padulong na si Bentulan nakadungog nalang siya og buto sa armas gikan sa gikahitaboan.

"Pagpadulong na nako nakadungog nalang ko og buto, pag-abot nako didto samdan na si Buanhog," sumala pang Bentulan sa telepono .

Si Buanhog dunay igo sa tuong bitiis gikan sa wala matinong kalibre sa armas apan wala matino kung giunsa pagkahitabo nga napusilan ang maong polis sanglit mismong si Bentulan wala makahibalo sa nahitabo sa iyang kauban.

Gisuwayan sa Banat News pagtawag ang imbestigador nga si SPO1 Elmo Rosales sa Fuente police station apan di kini makontak sa iyang cellphone.

Duha ka mga batan-on ang mipa-blotter sa Fuente police station nga gikulata sila niadtong higayuna ug giilang sila si Mark Arnado,21, nga taga Rafael Casis Village sa Mabolo ug Rafael Joseph Wong Orquina,20 nga taga Maria Luisa Village.

Si Bentulan mao nay nagdala kang Buanhog sa sa CCMC samtang padayon pang giimbestigar ang hitabo.