Mangingilad nga 'pari' nakabiktima'g ginang

Usa ka 34 anyos nga babaye ang midangop sa pagsumbong sa kapolisan human kini mabiktima sa nagpaparipari nga mangingilad.

Ang pagpangilad nahitabo sa miaging hapon sa Looc Seaweeds sa dakbayan sa Lapu-Lapu.

Ang biktima mao si Delia Toring, minyo nga nagpuyo sa barangay Gun-ob sa maong siyudad.

Ang nag-ilad sa biktima mao ang wala hiilhing lalaki nga disente ang pamiste ug nagsul-ob usab og polo nga puti nga daw pari gayod ang pamarog.

Ang biktima nga gisukitsukit ni PO2 Andres Gahi sa Theft and Robbery Section sa kapolisan sa maong dakbayan ang miingon nga giduol siya sa maong lalaki ug nagpaila kaniyang kabanay sa iyang bana nga bag-o pang nahibalik gikan sa Italya.

Mipasabot kini ngadto kaniya nga nanuroy sa iyang mga higala ug mga kabanay sa Sugbo nga kahatagan og kuwarta alang sa iyang pamilite sa pagbalik sa Italya.

Ang biktima miingon nga nahingangha na lamang siya kay tulin pa sa manatad kining midagan dihang iyang gihatag ang P2,500 nga salapi nga maoy naaghat kaniya sa pagtaho sa kapolisan.