Independence Day sa Mandaue ipahigayon

Ang kagamhanan sa dakbayan sa Mandaue ug mga opisyal niini nga gipangulohan ni Mayor Thadeo Ouano ang nagkahiusa sa nasudnong kagamhanan alang sa ika 108 nga kasaulogan sa atong Adlaw sa Kaugalingnan karong Lunes, Hunyo 12, 2006.

Nunot niini si Mayor Ouano maoy mangulo sa pagtambong sa mga kalihokan nga gihan-ay sa iyang buhatan nga magsugod sayo sa buntag pinaagi sa usa ka Balaang Misa nga pagahimoon sa Simbahan ni Saint Joseph.

Dugang nga kalihokan mao ang pagpakayab sa mga bandilang Pilipinhon sa palibot sa Heritage Plaza ug uban pa nga mga lugar.

Si Ouano mao usab ang mangulo sa programa nga ilang gipasiugdahan atol sa maong kasaulogan ug usa sa gidapit sa pagtambong mao si Leo Oracion, ang unang Pilipino nga nakasaka sa labing taas nga bukid sa kalibutan nga Mt Everest.

Sa maong programa maoy pagahimoon usab ang paghangop lang Oracion kinsa gipasigarbo usab sa mga Mandauehanon sa naangkon niining kalampusan.