Si Chief Supt. Silverio Alarcio sa pakighinabi sa mga tigbalita kagahapon mitug-an nga sukad napasar ug nahimong balaod wala kini makahatag og dakong epekto nga makapamenus sa krimen sanglit daghan gihapon ang mga nahitabong linuog nga krimen.
"I believe that there are other effective measures to deter crimes," sumala pang Alarcio sa usa ka interbyu sa lokal nga sibyaanan.
Apan si Criminal Investigation and Intelligence Branch chief Pablo Labra sa pakighinabi sa Banat News mibutyag nga dako ang posibilidad nga mosiaw og maayo ang krimen gumikan kay wala nay kabalak-ang silot ang mga nagplanong mohimo og krimen.
"Personally I am for death penalty, I think would-be criminals will think twice to commit crimes," sumala pang Labra.
Matud pang Labra nga kun ang usa ka nagplano palang nga mohimo og krimen makakita sa mga gisilutan og kamatayon makapaduha-duha kini sa ilang hunahuna kung ipadayon ang ilang buot buhaton.
Ang dinagkong drug pushing, rape, linuog nga pagpatay, plunder sama sa kasong giatubang karon ni kanhi Presidente Joseph Estrada, kidnap for ransom maoy pipila sa mga kasong mahimong masilutan og kamatayon.
Dugang pa ni Labra nga sa pagkakaron ang mahimo lang sa mga polis mao ang pagpangusog pa sa ilang mga operasyon ug mga kalihukan aron mapakgang ang mga planong krimen.
Ang Crusade Against Violence vice president Thelma Chiong ug iyang grupo dinhi sa Sugbu molusad og protest rally karong Martes diha sa Fuente Osmeña aron mopadayag sa ilang diskuntento sa pagtangtang sa maong balaod.