Sikyu naunay sa armas

Naunay sa iyang kaugalingong armas ang usa ka security guard atol sa pag-duty niini didto sa United Nations avenue Umapad dakbayan sa Mandaue kagahapon sa buntag.

Ang biktima mao si Rito Monleon, 20, ulitawo nga lumad sa Brgy. Ibo dakbayan sa Lapu-Lapu ug ubos sa SS7 Guard Force Security Agency nga nadistino sa TRANSCO nga nahimutang sa UN Ave. Umapad dakbayan sa Mandaue.

Atol sa imbestigasyon nga gihimo ni SPO1 Wilfredo Rodriguez sa kapolisan sa station 5 sa MCPO nasayran nga si Monleon bag-o lang nga mi duty ug sa dihang iyang gitarong pagbakos ang iyang pistol belt kalit lang nga natagak ang iyang armas.

Atol sa pagkatagak niini nakablitan ang gatilyo sa maong armas hinungdan sa pagbuto ug didto maigo sa walang paa ni Monleon.

Gidali pagdala sa Mandaue District Hospital si Monleon ug hinuon luwas na sa kakuyaw nga kahimtang.