P42,500 multahanan sa buotang drayber gipapas ni Tomas

Gikanselar ni Mayor Tomas Osmeña ang 208 ka mga pending violations sa Citom nga mikantidad og P42,500 sa usa ka PUJ drayber nga buotang miuli sa nakit-an niining dul-an sa tunga sa milyon ka pesos nga balor sa tseke niadtong miaging adlaw.

Kagahapon gipirmahan sa mayor ang paghatag og discount sa maong pending violations sa PUJ driver nga si Ronnie Rudinas diin sa P42,500 niining bayranang multa P100 na lang ang gipabayran sa maong drayber.

Gibutyag ni Rudinas nga gawas sa pagkanselar sa iyang dakong bayranan sa mga pending violations gihatagan pa gyud siya sa mayor og P5 mil nga salapi isip pahalipay sa pag-uli niya sa nahanaw nga linibo ka pesos nga balor sa tseke nga gipanag-iya sa usa ka Koc Suan Dy.

Ang nagsapawsapaw nga 208 ka mga pending violations sa Citom ni Rudinas gilangkuban kini sa kalapasan sa mga lagda sa trapiko sama sa no stopping, no smoking ug uban pa.

Gibutyag ni Rudinas dihang nahinabi sa Banat News nga daku kaayo ang iyang kalipay gumikan kay wala siya magtuo nga mahatagan sa maong pasidungog.

Si Rudinas nagtrabaho isip PUJ driver sugod pa niadtong tuig 1996 nga nanimuyo sa Sitio Sta. Ana, Banawa, Labangon kauban ang iyang asawa ug duha ka mga anak.

Kagahapong adlawa pormal na usab nga gikuha sa tag-iya ang linibo ka pesos nga balor sa mga tseke nga gi-turn over ni Rudinas sa mayor.