2 minor miikyas sa rehab sa Argao

Duha ka mga minor nga lalaki nga gidetinir sa Regional Rehabilitation for the Youth Center (RRYC 7) sa Candabong, Binlod, Argao tungod sa kasong homicide ug robbery mi-eskapo niadtong miaging adlaw.

Si SPO1 Esteban Albuera sa kapolisan sa nahisgutang lungsod maoy nasayran niini sa gihimong pagpakighinabi sa Banat News kaniya kagahapon.

Giila niya ang mga mi-eskapo nga mao sila si Rafael nga taga Landing, Liloan, Cebu ug Raymond nga pulos 17-anyos nga lumad nga taga Negros Oriental.

Dugang pa ni SPO1 Albuera nga si Rafael maoy nag-atubang og kasong homicide ug robbery usab ang kaso nga giatubang ni Raymond. Matud pa ni Albuera nga ilang nasayran ang maong hitabo pinaagi kang Beatrez Cuandot nga maoy house parents on-duty sa RRYC.

Si Cuandot miasoy kang Albuera nga iyang gisugo ang duha sa pagkawos og tubig sa ilang puso sa luyong bahin sa ilang edipisyo.

Sumala pa ni Cuandot ngadto kang Albuera nga natingala na lamang siya kay milungtad na og pipila ka oras wala na man gyod mahibalik ang duha ka mga bata.

Si SPO1 Albuera miingon nga posible nga ang duha ka mga bata mipahimulos sa kahigayonan sa pagkatkat sa koral.