Greg mihimakak aprobado na ang endorsement ni Purita

Si Bise-gobernador Gregorio Sanchez kusganong mihimakak nga giendorsar na sa hunta probinsyal ang aplikasyon ni Purita Parojinog aron maoy mohulip sa kasamtangang Cebu Customs Collector Atty. Maria Lourdes Mangaoang.

Matud ni Sanchez nga adunay mosyon nga nag-amendar sa resolusyon sa pag-imbitar ni Parojinog sa sunod caucus aron patubagon sa ilang mga pangutana kabahin sa rekord niini, mga kasong giatubang diha sa Ombudsman ug kwalipikasyon niini.

"There is a motion to amend the resolution to invite first Miss Purita Parojinog during our caucus and then after which we will take this resolution, sa ato pa wala mi endorsement, we did not endorse" ni Sanchez pa.

Sa susamang kalambuan, si Kongresista Antonio Cuenco nga nahinabi sa DyLA nagkanayon nga miduol kaniya si Parojinog nga nagdala og otap ug mihangyo kaniyang tabangan siya nga ma-promote gikan sa pagka-collector II ngadto sa pagka-collector V.

Matud ni Cuenco nga gidawat lang usab niya ang bio-data ug ang otap ni Parojinog.

Alang kang Sanchez dili husto nga aprobahan ang endorsement una pa imbitahon si Parojinog.

" There is no logic to approve the resolution and invite her later and ask questions? We did not endorse Parojinog we will invite her on a caucus and ask some questions " matud pa ni Sanchez.

Si Parojinog gikatahong nagdala og litson sa Kapitolyo atol sa caucus sa hunta probinsiyal. Apan nasayran sa mga bokal nga gikan kadto ni Parojinog sa dihang nahuman na sila og kaon.

Apan sukwahi sa pamahayag ni Sanchez, si Bokal Victor Maambong miingon kagahapon nga naaprobahan na ang maong endorsement ug sobra sa walo ka board member ang mipirma niini.

Matud ni Maambong nga dunay move ang presiding officer ug ang sponsor nga si Bokal Antonio Almirante sa maong endorsement apan ubos sa kondisyon nga pakigkitaan nila si Parojinog.

"Ang among resolusyon ihatag namo next caucus pero approved na to siya, pero dili lang namo ihatag kung dili mi ka pakigkita niya" ni Maambong pa.

Si Maambong mibutyag nga ang ubang board members adunay gustong ipangutana ni Parojinog.

Gitataw ni Maambong base sa "lateral attrition law" kung dili makaabot sa target collection ang usa ka Custom collector automatic kini siyang ibalhin ug angayang ipapataw sa Department of Finance kung nakapahigayon ba og maayong performance si Mangaoang.

Si Mangaoang sa usa ka interbyu sa kolumnista ning mantalaan nga si Fred Languido sa mitug-an nga di kwalipikadong collector si Parojinog.

Matud pang Mangaoang nga kung ipamugos nga ihulip kaniya si Parojinog dako kining kalapasan sa mga reglamentos sa Civil Service Commission sanglit dunay 60 ka mga mas dagko og ranggo diha sa BOC nga masapawan ni Parojinog, lima niini gikan dinhi sa Sugbu.