Deperensiyado sa pangisip gitadtad

Giingon dunay deperensya sa pangisip napalgang patay nga puno sa tadtad ang lawas sa iyang igsuon nga babaye nga nagtugway sa iyang kanding diha sa payag sa grupo sa mga mag-uuma sa miaging adlaw pasado alas 6 sa buntag sa Upper Tawog, Barangay Tal-ot Argao.

Nangayo pa og pagkaon sa iyang igsuon nga babaye ang biktima mga alas 2 sa kaadlawon sa wala pa siya patya.

Si PO3 Arnold Abiner sa Argao Police nga nahinabi sa Banat News mitug-an nga ang namatay mao si Virgilio Caminade, 46, ulitawo, nanimuyo sa maong lugar, kinsa nakit-an sa iyang igsuon nga si Lorena Rodriguez nga nagbuy-od sa yuta sa payag nga naputos sa dinunggaban ug tinigbasan ang tibuok kalawasan.

Ang payag sa mga mag-uuma gihinganlan og 'Banikanhong alayon Alang sa Nagkahiusang Kalikopan" nga ubos sa ilang pangu' nga si Mario Datanagan, asoy ni PO3 Abiner

Segun sa asoy ni Lorena Caminade ngadto sa kapulisan nga nianang ala una sa kaadlawon nisampit pa kaniya ang iyang igsoon aron mangayo og pagkaon, ug iya kining gihatagan ug gipakaon, apan wala na siya masayod kon hain paingon ang biktima, human nibiya sa ilang balay.

Dakong kahikurat ni Lorena sa dihang nagtugway siya sa kanding, nga iyang nakita nga patay na kini.

Gibutyag usab ni PO3 Abiner nga aduna na silay suspek nga gituohan nga maoy nagbuhat sa ingon kay matud pa, ang mga manok sa suspek giingon gipanglubag ang liog sa biktima, hinungdan nga labihang sukoa sa supek.

Apan nagdumili pa si Abiner sa pagtug-an sa pangan sa suspek tungod kay ila kining adtuon sa ilang dapit, kay tabukon kini og dagat, kay sumala pa kalit lang nahanaw ang suspek.

"Nindot man gud nang iyang mga manok, kay gikan sa Negros, pulos gyud na igtatari, unya gilubag man pod ang liog sa mga manok niining tawhana, (biktima) unya amo paning sabotan kay plitehan man mi sa tagtungod' matud ni PO3 Abiner.