P.4M giuli sa PUJ drayber

Ang kalisod sa kinabuhi karon di rason aron kalimtan nalang ang maayong gawi sa usa ka tawong nagkalisod. Kini maoy gihimo sa usa ka 36 anyos nga drayber sa PUJ dihang imbes nga ibulsa ang dul-an tunga sa milyon nga kwartang nakit-an diha sa iyang pasaheruang sakyanan, giuli niya kini.

Giplanuhan karon ni Mayor Tomas Osmeña nga papason ang tanang traffic violation nga nahimo ni Ronie Rudinas human giuli sa naulahi ang napunitang P433,311 nga balor sa 23 ka mga tseke sa Metrobank nga iya sa pangalang Koc Suan Dy.

Si Rudinas residente sa Apas ning dakbayan ug namasahero sa rotang Mabolo-Jones (03B).

Dugang sa pagpasaylo hatagan usab og reward si Rudinas sa iyang gibuhat aron di kini himuong kataw-anan sa iyang mga kaubang drayber nga lahi og baruganan.

"When I see drivers like these, I feel very, very encouraged that there's hope and the hope comes from ordinary people with strong sense of values," asoy pang Osmeña.

Sumala pa ni Rudinas nga human niya og pamahaw kagahapon gihinluan niya ang iyang pasaheruang jeep, diha niya makit-i ang usa ka sobre ilawom sa lingkuranan.

Dihang iyang gihiling mga tseke ang sulod niini nga linibo ang nakapatik, apan bisan sa kalisod silang duha sa iyang asawa nagkauyon nga ihatud kini sa Cebu City Hall.

Ang maong duha ka pundok sa mga tseke dunay nagbalor og P67,700 ug 268,637 nga gituuhang ideposituhay pa sa bangko, samtang ang laing pundok nagkantidad og P95,914 nga "pay to cash."

Si Rudinas mihatud sa tseke ngadto kang Osmeña inabagan ni City Councilor Augustus Pe.

Mipadayag si Rudinas nga iyang dawaton ang bisan unsang ihatag sa dakbayan sa iyang simpleng gihimo.