Batan-on gipusil sa nag-maskara

Nagmaskara ang gihulagway sa mga saksi nga maoy nagpusil sa usa ka batan-on diha sa dalan Bonifacio, Poblacion dakbayan sa Danao sa milabay'ng kaadlawon.

Ang biktima mao si Jade Escoton Yangan, 20, ulitawo ug lumad sa Suba, Danao.

Base sa imbestigasyon ni SPO1 Alan Muñoz sa Danao Police Station nasayran nga gikan si Jade sa usa ka diskohan nga gipahigayon sa dalan Mabini, Poblacion, Danao ug sa iyang pagpauli kini giatangan sa usa ka lalaki nga nagmaskara.

Atol sa ilang pagsugat kalit lang kini nga namusil ngadto kang Jade sa wala pa mailhing kalibre sa armas hinungdan sa pagkahiagum niini og samad pinusilan sa iyang tiyan ug gidala sa Danao District Hospital ug gibalhin sa Vicente Sotto Memorial Medical Center.

Human sa maong insidente ang suspek daling mipahilayo sa maong dapit. usa sa gidudahang anggulo niini mao ang panagbingkil sa mga grupo sa batan-on sa maong dakbayan.