21 anyos na-'hit and run' patay

Patay diha-diha ang usa ka 21-anyos nga lalaki kinsa nabiktima sa hit and run kagahapon sa kadlawon diha sa Barangay Kinalumsan dakbayan sa Lapu-Lapu.

Si Ramil Canoy nagpuyo diha sa Bethel Temple Kiddie Development Learning Center sa maong lugar nakaangkon og grabeng kadaot sa lawas tungod sa pagkabunal niini sa karsada human madasmagi sa usa ka puti nga van ug gituhoan nga maoy hinungdan sa kamatayon niini.

Si Senior Police Officer 1 Rogelio Trinidad traffic investigator sa Lapu-Lapu police mibutyag sa Banat News kagahapon nga si Canoy naglakaw diha sa daplin sa karsada human kini maglabay og basura.

Ang nahisgutang sakyanan gikan nagbiyahe sa Barangay Babag, paingon sa Lapu-Lapu proper og aksidenteng mibangga ni Canoy.

Imbes nga mohunong ang drayber sa maong van para susihon ang biktima mipahaguros hinoon kini og padagan palayo sa lugar.

Matud ni Trinidad nga wala pa mailhi ang suspetsado tungod kay wala makuha sa mga nakasaksi ang plaka sa sakyanan ug nag-follow-up sila sa insidente.