Lalaki gitabangag patay sa magsuon

Usa ang patay samtang usa ang samaran sa pinusilay ug pagpanigbas sa managsilingan diha sa Guinsay, Danao sa milabay'ng Sabado sa gabii.

Ang biktima mao si Salvador Roble Batoto, 58 minyo nga lumolupyo sa maong dapit ug Religilo Gonzales Capua, 47 minyo ug nagpuyo sa susamang dapit.

Ang mga suspetsado mao ang magsuong sila si Jose Rani ug Arman Batoto ug mga anak ni Salvador.

Sa imbestigasyon ni SPO1 Alan Muñoz sa Danao Police Station nasayran nga unang nagkabangi si Salvador ug Religilo gumikan sa ilang daang dumot ug sa dihang medyo nalupig ang amahan sa mga suspek nagpakitabang kini sa iyang duha ka anak nga si Arman ug Jose Rani.

Sa maong sitwasyon mitumaw ang pinusilay tali ni Religilo ug mga anak ni Batoto, diin sa sinukliay og bala ang amahang Batoto naigo sa tiyan samtang mao usab ang igo ni Capua.

Apan samtang nagsapupo sa tiyan si Capua giduol kini sa mga anak ni Batoto ug gitigbas sa liog , dughan ug kamot ang nag-una hinungdan sa pagkamatay niini.

Si Salvador gidala sa Danao District Hospital ug gibalhin usab sa Vicente Sotto Memorial Medical Center samtang ang magsuong Batoto misibat kini human sa maong hitabo.

Padayon pa ang kapolisan sa Danao sa pagpangita sa duha ka managsoon aron ilang atubangon ang krimen nga ilang gihimo.