Walay dugang singil nga ipatuman – MCWD

Ang kadagkoan sa Metro Cebu Water District mipasalig nga dili pa sila mopatuman og increase sa bayranan sa ilang tubig sanglit wala pa kaayo sila makasinati og grabeng alkanse sa ilang panudlanan.

Giluwatan ni Paredes ang maong katin-awan nga walay usbaw sa bayranan karong mga buwana tungod sa kabalaka sa ubang konsumidor nga mosamot ang ilang kalisod kon ang MCWD mopatuman og increase.

Matud ni Paredes nga nahukman na unta sa mga sakop sa Board kaniadto pa nga sugod sa miaging tuig ang MCWD mopatuman og tag 12 porsiyento nga increase matag tuig sulod sa lima ka tuig.

Kini aron nga ang water district makatigum og salapi nga magamit nila sa operating cost, ilabi na sa ilang pagmugna og improvement sa mga water project aron makahatag og binipisyo sa katawhan.

Samtang gitinguha usab ni Paredes nga unta mapadali na ang pagsuplay og tubig gikan sa Carmen pinaagi sa Ayala consortium aron nga masulbad na ang kakuwang og tubig sa Metro Cebu.