Bus misampak sa kahoy, 3 naangol

Tulo ka tawo ang naangol human midasmag sa punoan sa Gemelina ang Ceres bus nga ilahang gisakyan nga dunay body number I-1052 tungod kay nagdaot ang makina niini kagahapon sa 3:45 sa kadlawon diha sa Barangay Colasi, Samboan.

Ang mga biktima giila sa kapolisan sa Samboan nga usa ka Bravo drayber sa maong bus, Bonifacio Lopenario pasahero ug ang konduktor sa maong sakyanan nga wala makuha ang pangalan.

Si Police Inspector Marlon Gumabao hepe sa kapolisan sa Samboan nagkanayon kagahapon sa Banat News nga ang maong insidente gitaho ni Alejandro Letijo inspector sa kompaniya sa maong bus ug wala nila makuha ang saktong mga pangalan sa mga biktima.

Matud ni Gumabao nga ang maong bus nagbiyahe gikan dinhi sa dakbayan sa Sugbo paingon diha sa Bato para mogarahe na apan pag-abot sa maong lugar kalit nga nagdaot ang makina niini ug wala na kini makontrolar ni Bravo ug maoy hinungdan nga nabangga kini.

Apan walay gikataho nga laing nangaangol ug si Lopenario na lang ang nahibiling pasahero sa maong sakyanan tungod kay ang ubang pasahero nakakanaog na.