Modernong ekipo medikal giinagurahan

Giinagurahan kagahapon sa Government Service Insurance System (GSIS) ang modernong kahimanan nga magnetic resonance imaging ug CT Scan Machine diha sa Perpetual Succour Hospital.

Ang maong mga ekipo napalit pinaagi sa GSIS Hospitalization Support Program nga gipanglantawang dakong matabang sa mga miyembro sa GSIS kun gikinahanglan.

Si GSIS president Winston Garcia maoy pinasidunggang dinapit sa maong kalihukan diin mipadayag nga duna nay kamandoan sa GSIS nga iyang gipakatap sa pagpangita og mga tambalanang mahimong 'partner' alang sa mga umaabot nga programa sa iyang buhatan.

Sa pagkakaron ang PSH maoy nag-inusarang tambalanan gawas sa Luzon nga nahimong kaabag sa GSIS sa maong programa ug padayon pang nangita ang maong buhatan og ubang tambalanan.

Sa maong programa, ang GSIS maoy mopalit og susamang ekipo ug ipagamit kini ngadto sa mga tambalanang partner, ang mga hospital maoy mo-operate niini ug mo-maintain apan magpabilin kining gipanag-iya sa GSIS.

Sa susamang paagi, ang hospital nga makadawat niini mohatag og diskwento nga 50 porsiyento sa mga GSIS pensioners kun mogamit sa maong ekipo ug dugang mga diskwento gikan sa 10 ngadto sa 40 porsiyento sa ubang serbisyo, medisina, professional fees, lawak ug uban pa, lakip na usab sa mga dependents sa kwalipikadong miyembro.

Sa pagkakaron ang UST Hospital sa Manila, Capitol Medical Center sa Quezon City, Lorma Medical Center sa San Fernando sa La Union ug AUF Medical Center sa Angeles, Pampanga maoy nakadawat sa susamang programa.